Beiteområdet skal vere eigna for dyra
Beiteområdet skal vere eigna for dyra. Det betyr at beitet skal gi dyra nok næring, og at beiteområdet er eit trygt nok levemiljø, der dyra trivast. Dyrehaldaren må vurdere dette både før dyra blir sleppte og mens dei blir haldne der.
På beiteområdet skal dyra ha lett tilgang til nok og godt nok fôr i form av plantar eller lav. Det skal også vere godt drikkevatn for dyra der. Dersom plantar eller lav er heilt fråverande eller utilgjengeleg for beitedyra, og dyra må få alt fôret av dyrehaldaren, er området ikkje egna for beite som driftsform etter dyrevelferdslova § 8 første ledd.
Plantar, lav og drikkevatn skal vere av god kvalitet, dekke behovet til dyra for næring og væske, og fremme god helse og velferd. Kvaliteten og kvantiteten skal altså bidra til at dyra er friske og trivst på beitet.
Mangel på tilgjengelege ressursar frå naturen si side gjer at dyrehaldaren må fôre dyra og eventuelt gje dei vatn. Om dyrehaldaren ikkje sørger for å tilføre dyra nok fôr og vatn, vil hald av dyra i området vere i strid med dyrevelferdslova § 24 første ledd bokstav a og forskriftene om dyrevelferd.
Beiteområdet skal vere eit godt levemiljø, også utover sjølve beiteaktiviteten. Både terreng og klima skal bidra til god velferd, tryggleik og trivsel for dyra. Viss området ikkje er eit godt levemiljø for dyra, er det ikkje eigna som beite.
Når beiteperioden er over, og det går mot vinter, skal beitedyra hentast heim og få tilgang til opphaldsrom. Dette er forskriftsfesta for sauer og geiter, men gjeld generelt for dyr med avgrensa beiteperiode. Tamrein er ute heile året, men også dei skal flyttast til eigna beite etter årstida.