Dyrehaldaren skal hjelpe beitedyra
Dyrehaldaren skal sørge for at sjuke, skadde, avmagra, morlause og hjelpelause beitedyr får forsvarleg behandling eller anna nødvendig hjelp.
Dyra skal avlivast viss det er nødvendig. Dette gjeld både når dyrehaldaren sjølv finn dyra, og når dyrehaldaren får melding om det frå andre som har funne dei. Plikta til å hjelpe eigne dyr følger av dyrevelferdslova § 3 og § 24 første ledd bokstav b og forskriftene om dyrevelferd.
Turgåarar og andre som finn sjuke, skadde eller hjelpelause beitedyr, har også hjelpeplikt. Ifølge dyrevelferdslova § 4 kan dei hjelpe dyra ved å kontakte dyrehaldaren. Dyrehaldarar med dyr på beite, bør sørge for at folk i området kan finne namn, adresse og telefonnummer til dyrehaldarar som har dyr på beite.
Sjuke og skadde dyr skal ha nødvendig førstehjelp på staden. Viss dyret har brekt bein eller har andre alvorlege skadar, skal dyrehaldaren avlive det. Dyrehaldaren bør ha med både førstehjelpsutstyr og avlivingsutstyr, og hen skal ha kompetanse til å bruke begge delar forsvarleg.
Morlause dyr skal om mogleg takast med heim viss dei ikkje klarer seg like godt utan mordyr.
Dyr som står fast, eller er hjelpelause på andre måtar, skal ha nødvendig hjelp. Viss dyra er vanskeleg tilgjengelege, skal dyrehaldaren skaffe nødvendig assistanse for å berge eller avlive dyra.