Mat i barnehagar

Publisert

10.02.2022

Immunforsvaret hos barn er ikkje fullt utvikla, og derfor blir dei lettare sjuke enn vaksne. Nokre matborne smitte­stoff gir vanlegvis ikkje alvorleg sjukdom hos friske personar, men kan ha alvorlege konsekvensar for personar med lågt immun­forsvar, som for eksempel barn. Derfor er det viktig at maten i barne­hagen er trygg å ete, og at matvarene de serverer, er eigna for små barn.

Verksemda er sjølv ansvarleg for å innreie og drive i samsvar med regel­verket.

Kva krav som blir stilte til hygiene i barne­hagen, kjem an på kva slags mat som blir laga, og kor mange barn som får servert maten. Viss det berre blir laga enkel brød­mat og pose­supper, er det færre krav til intern­kontroll og opp­læring av dei tilsette enn viss det er meir omfattande matlaging.

Korleis behandle mat på frukost- og lunsjbord

Matvarene må ikkje bli forureina, og dei må bli oppbevarte slik at kvaliteten blir halden oppe. Bakteriar kan blomstre opp når maten står på bordet. Oppbevaring i rom­temperatur vil derfor redusere haldbar­heita til matvarene.

Kjøtt- og fiskepålegg er meir utsett enn ost. Viss maten blir eten innanfor haldbarheits­datoen, er det vanlegvis ikkje farleg å servere det same pålegget fleire gonger, så lenge det ikkje står lenge på bordet.

Arbeidsklede

Bruk forkle når de lagar mat. Den som handterer mat, har eit sjølvstendig ansvar for at maten ikkje blir forureina under tillaginga. Derfor må dei som lagar mat, ha god personleg hygiene og bruke reine og eigna klede.

Arbeidsklede skal verne maten, ikkje den tilsette mot forureining. Bruk derfor andre arbeids­klede ved handtering av mat enn ved andre oppgåver, som for eksempel omsorg for barn.

Temperaturkontroll i kjøl og frys

Det er de sjølve som avgjer om temperaturen skal kontrollerast, og kor ofte det skal skje. Ei uregjerleg kjøle- og fryse­innretning kan krevje meir kontroll og oppfølging enn tilsvarande utstyr med stabil og jamn drift. De gjer ikkje desse kontrollane for Mattilsynets skuld, men som eit ledd i eiga styring og kontroll av komponentar, gjenstandar og gjeremål som er viktige for mat­tryggleiken. Ein vanleg feil er å gjere målingane utan plan og hensikt. Da går dei fleste lei etter kort tid. Rådet er å gjere det hyppig eller sjeldan nok til at de kan gå god for at kjøle­kjeda er intakt.

Temperatur er viktig for å unngå uønskt vekst av bakteriar. Regel­verket pålegg deg derfor å sikre at kjøle­kjeda blir halden ved like. Dette er ein del av internkontrollen. De må også utføre jamlege kontrollar for å sikre at dette kravet er oppfylt.

Internkontroll

Internkontroll betyr at de har styring og kontroll på alle viktige arbeids­oppgåver som har noko å seie for mattryggleiken. Dette gjeld blant anna krav til råvarer, temperaturar, reinhald og personleg hygiene.

Internkontrollen skal sikre at det er etablert faste rutinar for viktige arbeidsoppgåver, slik at slump ikkje avgjer korleis arbeidet blir utført. Det er også ein del av intern­kontrollen å sjekke at rutinane fungerer, og vurdere om det er behov for å gjere endringar.

Internkontroll inneber å ha oversikt over arbeids­oppgåvene og sikre systematisk gjennomføring. Internkontroll er det motsette av slump og er ein kontinuerleg forbetrings­prosess. Start med dei rutinane de allereie har, og gjer det enkelt nok til at de har god oversikt, kontroll og styring.

Vasskvalitet

Vatnet de bruker, skal ha drikkevass­kvalitet. Viss barnehagen er tilknytt eit offentleg eller privat vassverk, er det vass­verket som skal sørgje for vass­kvaliteten. Følg med på varsel og informasjon frå vassverket.

Viss barnehagen har eiga vass­forsyning, er eigaren av barnehagen også ein vassverks­eigar etter drikkevassforskrifta og må følge krava som gjeld i forskrifta. Mattilsynet har utarbeidd eit informasjons­skriv som beskriv krava for dei minste vassforsynings­systema. Her finn de nyttig informasjon om forureiningsfarar og behandling av råvatn, og om kva prøver og analysar som må gjennomførast. De må sørge for at vassforsynings­systemet er registrert hos Mattilsynet. De kan registrere systemet via Mattilsynets nettside.

Sjå meir om krava til barnehagar i denne rettleiaren

Meldeplikt for serveringsstader

Barnehagar med matservering skal vere registrerte hos Mattilsynet.