Slik handterer du hestegjødsel
Hestegjødsel må lagrast og brukast slik at det ikkje fører til forureining eller fare for smitte. For deg som sit med eit overskot av hestegjødsel, er det fleire måtar du kan bruke denne ressursen på.
- Teksten er oppdatert med nye krav
Artikkelen er oppdatert med informasjon om krava til hestegjødsel i gjødselvareforskrifta og forskrift om lagring og bruk av gjødsel mv. Begge forskriftene tredde i kraft 1. februar 2025. Det er også tatt inn informasjon om at reglane i animaliebiproduktregelverket for bruk av ubearbeidd hestegjødsel frå eit anna fylke blir stramma inn frå 1. februar 2027.
Det er fleire regelverk som regulerer hestegjødsel. Her får du ein oversikt over reglar du må forhalde deg til ved handtering og bruk.
Oppsamling og lagring av gjødsel
Gjødsel frå driftsbygningar skal samlast opp. Utandørs må ein hindre avrenning frå gjødsla ved å unngå at den samlar seg opp på same stad over lengre tid. Luftegardar, utegard, fôrings-, drikke- og kvileplassar må plasserast i god avstand til vassdrag og dreneringssystem. Flatt terreng er betre egna enn terreng som heller mot vassdrag. Minst ei gong i vekstsesongen og om hausten må du fjerne gjødsel som har samla seg på slike plassar.
Hestegjødsel kan lagrast rett på bakken i inntil tre år. Gjødsla må plasserast slik at overflatevatn ikkje renn inn i haugen, og den kan ikkje liggje på område som kan vere utsette for flaum. Avstanden må vere så stor at det ikkje er fare for ureining av bekk, elv, innsjø eller sjø. Tenk også på at luktproblem skal avgrensast, så ta t.d. omsyn til den framherskande vindretninga.
Les meir i rettleiinga til gjødselbruksforskrifta (landbruksdirektoratet.no)
Ta kontakt med kommunen viss du har spørsmål om reglane som gjeld for lagring av hestegjødsel.
Bruk på jordbruksareal
Har du eit hestehald utan mistanke om smittsame dyresjukdommar, kan du spreie ubearbeidd hestegjødsel på jordbruksareal innanfor fylket. Med jordbruksareal reknast fulldyrka og overflatedyrka areal, i tillegg til innmarksbeite viss dette er godkjend som spreieareal av kommunen.
Hestegjødsla må inngå i gjødslingsplanen på det gardsbruket der ho blir spreidd. Det er krav til mengda du kan spreie og til tidspunktet for spreiing. Krava til spreieareal, spreietidspunkt og gjødslingsplan er beskriven i forskrift om lagring og bruk av gjødsel mv.
Les meir i rettleiinga til gjødselbruksforskrifta (landbruksdirektoratet.no)
Ta kontakt med kommunen viss du har spørsmål om reglane som gjeld for bruk av ubearbeidd hestegjødsel.
Mattilsynet må gi løyve dersom du ønsker å spreie ubearbeidd hestegjødsel på jordbruksareal i eit anna fylke. Det er mottakar av hestegjødsla som sender søknaden til Mattilsynet, og det må dokumenterast at det ikkje er påvist smittestoff som for eksempel salmonella, campylobacter eller MRSA i besetninga som gjødsla stammar frå. Løyvet blir gitt for inntil eitt år om gongen, og frå 1. februar 2027 kan slike løyve kun gis i særskilde tilfeller.
Gi bort hestegjødsel for bruk i private hager eller grøntanlegg
Du kan ikke omsetje eller gi vekk hestegjødsel til privatpersonar for bruk i hagar utan at gjødsla er omdanna i eit anlegg som er godkjent av Mattilsynet.
Du kan heller ikkje omsette eller gi vekk hestegjødsel til jordproduksjon, revegetering, bruk i parkar eller andre grøntareal utan at gjødsla er omdanna i eit anlegg som er godkjent av Mattilsynet.
Levere til godkjent anlegg
Hestegjødsel kan leverast til eit anlegg som er godkjent for mottak av animalske biprodukt. Det er mest aktuelt å levere hestegjødsel til eit komposteringsanlegg.
Sjå liste over komposteringsanlegg som er godkjent av Mattilsynet. Listene gir informasjon om kva kategoriar av biprodukt anlegga kan ta imot. For å kunne ta imot husdyrgjødsel må dei vere godkjent for å ta imot animalske biprodukt i kategori 2. Ikkje alle anlegg som er godkjent for kategori 2 bruker ubearbeidd husdyrgjødsel som råvare, så ta kontakt med anlegget for å høyre.
Kompostering før bruk på eige jordbruksareal
For å få betre gjødseleffekt er det mange som komposterer eigen hestegjødsel i ein periode før dei bruker gjødsla på eige jordbruksareal. Denne typen kompostering blir sett på som lagring før bruk, og set ikkje krav til komposteringsmetode eller hygienisk kvalitet på komposten og krev heller ikkje godkjenning.
Kompostere sjølv for sal og omsetning
Viss du skal kompostere gjødsla for å selje eller gi bort kompost til bruk i private hagar, grøntanlegg og jordbruksareal, må anlegget godkjennast av Mattilsynet. For å få godkjenning, må anlegget innfri visse krav til behandling av hestegjødsla, blant anna er det krav til bearbeidinga og den hygieniske kvaliteten på komposten.
Les om krava for kompostering etter animaliebiproduktforskrifta i Veileder for komposteringsanlegg
Kompost frå eit godkjent anlegg kan omsetjast som gjødselvare. Du må sørge for at produktet overheld kvalitets- og merkekrav i gjødselvareforskrifta. Du må også registrere deg som produsent av gjødselvarer.
Les meir i Veileder til gjødselvareforskriften.
Dersom du skal kompostere sjølv må du undersøke med Statsforvaltaren om det krev løyve frå dei.
Strengare reglar for hestegjødsel frå hestearrangement med internasjonal deltaking
Hestegjødsel frå hestearrangement med internasjonal deltaking må behandlast i eit anlegg som Mattilsynet har godkjent for å ta imot animalske biprodukt i kategori 2. Det er ikkje tillate å spreie denne gjødsla direkte på jordbruksareal. Bakgrunnen er at risikoen for å spreie smitte er høgare for denne gjødsla enn for annan hestegjødsel.