Til dyrehelsepersonell – om behandling mot P. ovis
Mattilsynet legg ikkje lenger restriksjonar på dyrehald med geit og kameldyr som får påvist Psoroptes ovis. Har du mistanke om eller påviser midden P. ovis på sau, må du straks kontakte Mattilsynet.
Meld frå til Mattilsynet
Har du mistanke om saueskabb i eit dyrehald med sau, skal du straks melde frå til Mattilsynet på telefon 22 40 00 00. Er det mistanke om midden i dyrehald med kameldyr eller geit, er det tilstrekkeleg at du melder frå til Mattilsynet så fort som praktisk mogleg.
Behandling
Mattilsynet vil ikkje lenger pålegge å behandle kameldyr og geiter dersom midden blir påvist i slike dyrehald. Mattilsynet anbefaler likevel slik behandling når midden er påvist. Dersom du som veterinær skal behandle geit eller kameldyr mot midden, bør alle dyr i dyrehaldet bli behandla samtidig. Mattilsynet anbefaler ikkje behandling mot midden "for sikkerheits skuld", for eksempel i kontaktdyrehald.
Veterinærinstituttet og Vetlis (vetlis.no) har gitt Mattilsynet oppfordringar om behandling. Dei anbefaler injeksjonspreparat, da innsida av øyra er lite tilgjengelege for pour-on-preparat.
Viss det er praktisk mogleg blir det anbefalt at dyra blir overførte til eit reint miljø etter kvar behandling. Det er ikkje ein føresetnad for å lykkast, men viktigast viss miljøet er fuktig og kaldt.
Behandling av geit
Det finst ikkje injeksjonspreparat mot ektoparasittar registrerte til geit. Både ivermektin (Ivomec®) og doramektin (Dectomax®) er registrerte til sau. Begge kan brukast til geit, men doramektin er angitt å vere mest effektivt mot P. ovis, og det har dessutan indikasjon P. ovis hos sau.
Det skal bli gitt to behandlingar med ti dagars mellomrom etter følgande dosering:
- Dectomax inj: 1 ml per 33 kg kroppsvekt, som svarer til 0,3 mg/kg. Det er altså høgare dosering ved behandling mot P. ovis enn mot andre parasittar.
- Ivomec inj: 0,3 mg/ kg
Begge preparata kan bli gitt både i.m. og s.c.
Tilbakehaldingstider
Regelverket som gjeld for tilbakehaldingstider, er lov om legemiddel til dyr (legemiddellova). Legemiddellova gjennomfører forordning om legemiddel til dyr 2019/6. Artikkel 115 i forordninga må følgast for berekning av rett tilbakehaldingstid. Du kan lese meir i Veiledning om regler for bruk av legemidler til dyr.
Hugs at tilbakehaldingstida for økologiske dyr eller produkt ved bruk av legemiddel med tilbakehaldingstid er dobbelt så lang som i konvensjonelt landbruk.
Følgande tilbakehaldingstider gjeld ved behandling av geit mot P. ovis:
| Dectomax inj., behandling av geit mot P. ovis | Mjølk | Kjøtt |
| Geiter som produserer konsummjølk, skal ikkje behandlast i laktasjonen eller 105 døgn før kjeing. | 116 døgn | |
| Ivomec inj., behandling av geit mot P. ovis | Mjølk | Kjøtt |
| Geiter som produserer konsummjølk, skal ikkje behandlast med Ivomec inj. Preparatet er ikkje godkjent for dyr som produserer mjølk til konsum. Drektige dyr som skal produsere mjølk til konsum, skal ikkje behandlast dei siste 60 døgn før forventa fødsel. | 74 døgn |
Behandling av kameldyr
Ivermectin (200 µg/kg) administrert subkutant tre gonger med ti dagars mellomrom er angitt som tilstrekkeleg til å eliminere P. ovis.
Behandling av kanin
For behandling av kaninar som ikkje skal til humant konsum (hobby-/kjæledyr), blir Stronghold (Selamectin) påflekkingsvæske anbefalt: 6–18 mg/kg, påflekking ein gong. Stronghold kjem i tubepipettar med ulik mengde selamectin (15–240 mg/pipette), slik at ein kan velje den tubestorleiken som gir rett dosering til vekta på den aktuelle kaninen.