Pollen som fôr til honningbier

Insektpollinerte plantar lokkar insekt til å frakte pollen frå plante til plante ved at insekta får ete noko av pollenet. Derfor inneheld pollen frå insektpollinerte plantar mykje protein og feitt som gjer pollenet attraktivt å ete for insekta og som er grunnen til at insekt samlar pollen.

Bier samlar pollen frå støvberarane til plantar og berikar det med nektar og enzym. Dette gjer at pollen held seg saman og dannar større korn som biene kan bringe til bikuben der dei bruker det til å mate avkommet sitt og lagre næring for dårlege tider. Birøktarane kan samle ein liten del av dette biepollenet idet bia flyg inn i kuben. Slikt biepollen er ei blanding av blomsterpollen, nektar, enzym og biesekresjonar og blir eit animalske biprodukt.

Omsetning av pollen til bruk som fôr må derfor følge dei generelle reglane i animaliebiproduktregelverket jf. forordning 1069/2009 art 31.

I samsvar med desse krava skal biepollen til bruk i fôrblanding

• vere framstilt av kat 3-materiale, sjå forordning 1069/2009 art 10 (pollen fell under bokstav e)
• vere samla inn eller behandla i samsvar med vilkåra for trykksterilisering eller andre vilkår for å sikre at dei er trygge. Det betyr at biepollen må vere behandla med ein godkjent metode som gir behandla animalske protein (PAP) og eventuelt smelta feitt.
• komme frå godkjent/registrert verksemd avhengig av kva type animalsk biprodukt / avleidde produkt det gjeld. Aktuelt er godkjent som bearbeidingsanlegg etter animaliebiproduktregelverket og registrert som produsent av fôrmiddel etter fôrhygieneregelverket.
• oppfylle krav til sporing gjennom bruk av handelsdokument. Krav til bruk av handelsdokument stansar ved omsetning av fôrblanding der biepollen inngår.

I tillegg til desse generelle krava er det særlege helsekrav til biprodukt av biavl. Materialet skal ikkje komme frå område som er underlagde forbod i samband med utbrot av følgande sjukdommar som kan ramme bier: amerikansk bipest, akarinose, lita kubebille eller tropilaelaps-midd.

I Noreg er vi også bekymra for åpen yngelråte, som er ei liste 2-sjukdom ifølge dyrehelseforskrifta, vedlegg I. Det er også liste 3-sjukdommar som kan ramme bier.

Les meir om nasjonal liste 1-, 2- og 3-sjukdommar

Desse føresegnene skal legge til rette for at det kan gjennomførast offentleg kontroll med kvart enkelt parti. Det medfører blant anna at den som vil innføre biepollen frå EØS til bruk som fôr eller i fôrblanding, må registrere seg som importør.

Føresegnene om innførsel frå EØS omfattar registrering, førehandsmelding i skjematenesta og melding i Traces.

Veileder om import - samhandel av fôrvarer

For import frå land utanfor EU er det også krav om hygienesertifikat.

I tillegg må nasjonale krav om salmonella og GMO bli oppfylt, sjå forskrift om fôrvarer.

Ei verksemd som produserer fôrblanding til bier, skal vere registrert med aktiviteten produksjon av fôrblanding.