Nye matvarer og nye bakgrunnsdata i Matvaretabellen
Matvaretabellen har blitt oppdatert med næringsstoffverdiar for grønsaker, drikke og middagsrettar. Til saman er det 97 nye og 395 oppdaterte matvarer i årets versjon, og tabellen gjev dermed eit endå betre grunnlag for å vurdere kor mykje vi får i oss av viktige næringsstoff. Nettsida til Matvaretabellen har òg enkelte endringar i designet.
- I årets versjon av Matvaretabellen har vi lagt til meir bakgrunnsinformasjon om næringsstoffverdiane. Når ein klikkar på ein næringsstoffverdi i Matvaretabellen, vil ein få meir informasjon om kor verdien kjem frå og kva metode som er brukt for å kome fram til verdien, fortel seniorrådgjevar i Mattilsynet, Jorån Østerholt Dalane.
Alle matvarene har òg fått ein FoodEx2-kode. FoodEx2 er matvareklassifiseringssystemet til den europeiske myndighet for næringsmiddeltrygghet (EFSA). Desse nye bakgrunnsdataene gjer at brukarane av Matvaretabellen enkelt kan finne meir detaljert informasjon om dataene.
Nye næringsstoffverdiar for grønsaker og jod
Vi har oppdaterte næringsstoffverdiar for grønsakene spinat, sellerirot, raudkål, stongselleri, agurk, isbergsalat, purre og kålrot. Dette er viktige matvarer i det norske kosthaldet, og dei oppdaterte verdiane vil difor kunne vere nyttig både for forbrukarar og fagpersonar i vurdering av inntak av næringsstoff som kostfiber, vitamin og mineral.
I samband med Jodberikningsprogrammet som blei lansert i 2025 av Folkehelseinstituttet, Helsedirektoratet og Mattilsynet, har vi oppdatert jodinnhaldet i matvarer som egg, enkelte fiskeartar, salt med tilsett jod og vegetabilske alternativ til mjølk.
I tillegg har vi utvida utvalet av drikke og middagsrettar, og lagt til matvarer som burrata, smoothieblandingar og daddelkuler, fortel Dalane.
I årets versjon er mange produktspesifikke matvarer fjerna og erstatta med generiske matvarer.
Den norske Matvaretabellen er ein matvaredatabase som viser energi og næringsinnhald i matvarer. Tabellen er eit viktig oppslagsverk og reiskap i matforvaltning og ernæringspolitikk, i undervisning og opplysningsarbeid og for helsepersonell og forskarar.
Matvaretabellen kan òg brukast av næringsmiddelindustrien som grunnlag for næringsdeklarasjonar og ved matproduksjon.
Les meir om:
Analyser av næringsstoffer, tungmetaller, PFAS, nitrat og nitritt i grønnsaker
Levere data til Matvaretabellen
Food classification standardisation – The FoodEx2 system (efsa.europa.eu)