Registrering og godkjenning av verksemder i fôrkjeda
Med få unntak skal alle verksemder i fôrkjeda, frå primærproduksjon til produsentar, omsettarar, lagerhald og transportørar, vere registrerte eller godkjente.
Innhald på denne sida
- Registrering og godkjenning av verksemder i fôrindustrien
- Registrering av primærprodusentar
- Registrering av hestehald med produksjonsdyr som inngår i matkjeda
- Registrering av transportørar
- Registreringskrav for *forsøksfôrinstitusjonar
Kravet til registrering, eventuelt godkjenning, følger av forskrift om fôrhygiene, som gjennomfører forordning (EF)183/2005 artikkel 9 og 10.
Om ei verksemd skal registrerast eller godkjennast, avheng av aktiviteten for verksemda. Det er den driftsansvarlege for verksemda som har ansvaret for registrering eller godkjenning, og for at verksemdene etterlever relevant regelverk.
Nokre fôraktivitetar krev også registrering eller godkjenning etter TSE-forskrifta. Verksemder som produserer og handterer medisinfôr må registrerast eller godkjennast i samsvar med medisinfôrforskrifta.
Registrering og søknad om godkjenning blir gjord via skjemaet "Registrering og/eller godkjenning av fôrverksemd" i Altinns skjemaløysing.
Når du er registrert eller blir godkjent, får du tildelt eit registrerings- eller godkjenningsnummer som består av den internasjonale IsO-koden for Noreg (NO) og eit fleirsifra nummer. Godkjente verksemder vil i tillegg få teiknet α før NO. Verksemda blir sett på ei offentleg liste over registrerte og godkjente fôrverksemder på mattilsynet.no.
Det at alle ledd i fôrkjeda skal vere registrerte eller godkjente, gjer det mogleg for Mattilsynet å gjennomføre offentleg kontroll. Det er berre tillate å skaffe og nytte fôrvarer frå verksemder som er registrerte eller godkjente, og listene kan brukast til å sjekke at dei du handlar med, er registrerte eller godkjente.
Liste over godkjente produkter og virksomheter
Registrering og godkjenning av verksemder i fôrindustrien
Reglane for registrering og godkjenning gjeld for verksemder som blant anna produserer eller omset tilsetningsstoff og premikser til fôr.
Du finn reglar for godkjenning og registrering i forordning (EU) 183/2005 vedlegg IV.
Verksemder som må ha godkjenning
Tilsetningsstoff
Verksemda skal vere godkjent dersom de produserer og eller omset
- teknologiske tilsetningsstoff: antioksidantar som det er fastsette eit størsteinnhald for
- ernæringsmessige tilsetningsstoff: alle typar
- sensoriske tilsetningsstoff: fargestoff i gruppa karotenoider og xantofyller
- avltekniske/zootekniske tilsetningsstoff: alle typar
Premikser
Verksemda skal vere godkjent dersom de produserer eller omset premikser som inneheld
- ernæringsmessige tilsetningsstoff:
- A- og D-vitamin
- Sporstoff: Koppar og selen
- avltekniske/zootekniske tilsetningsstoff: andre avltekniske/zootekniske stoff
- koksidiostatika og histomonostatika
Fôrblandingar
Verksemda skal vere godkjent dersom de produserer fôrblandingar som inneheld
- avltekniske/zootekniske tilsetningsstoff: andre avltekniske/zootekniske tilsetningsstoff
- koksidiostatika og histomonostatika
Annan produksjon
Verksemda skal også vere godkjent dersom de
- behandlar vegetabilsk olje
- produserer feittsyrer
- produserer biodiesel
- blandar feitt
Dette kjem fram av forordning (EU)183/2005 vedlegg II, pkt. 10 om "Anlegg og utstyr".
Verksemder som skal registrerast
Verksemder som ikkje blir omfatta av plikta til godkjenning skal vere registrerte.
Dette gjeld
- produsentar og omsettarar av fôrvarer som ikkje er godkjenningspliktig
- frittståande lagar
- transportørar av fôrmidlar (råvarer), tilsetningsstoff, premikser og bruksferdige fôrblandingar
Detaljhandel av fôrvarer til selskapsdyr/kjæledyr er halde unna registreringsplikta.
Krav til godkjente eller registrerte verksemder
Enten verksemda er registrert eller godkjent, er det dei same krava og pliktene som gjeld.
Verksemda må oppfylle relevante krav om grunnføresetnader som gjeld anlegg og utstyr, personale, produksjon, kvalitetskontroll, lagring, transport, registrering/journalar, reklamasjon og tilbakekalling av produkt (forordning (EU) 183/2005, vedlegg 2).
Vidare blir det stilt systemkrav til verksemda om å styre og kontrollere aktivitetane i tråd med ein gjennomført fareanalyse basert på HACCP-prinsippa (forordning (EU)183/2005, art. 6 og 7).
Europeisk fôrindustri har utarbeidd retningslinjer som kan brukast som eit hjelpemiddel for å oppfylle krava. Desse finn du på EUs nettside.
Europakommisjonen har laga eit nyttig rettleiingsdokument om registrering og godkjenning: Guidance document on the implementation of certain provisions of Regulation (EC) No 183/2005 laying down requirements for feed hygiene(europa.eu)
Det at alle ledd i fôrkjedene skal vere registrerte eller godkjente, gjer det mogleg for Mattilsynet å gjennomføre offentleg kontroll. Det er berre tillate å skaffe og nytte fôrvarer frå verksemder som er registrerte eller godkjente.
Mattilsynets saksbehandling og tilsyn
Mattilsynet kan følge opp registreringa med kontroll for å verifisere at krava er oppfylte.
Du som søker godkjenning, skal også erklære at dei tilfredsstiller relevante krav i vedlegget til forordninga 2 og styrer og kontrollerer i tråd med gjennomført HACCP-analyse. Dei kan likevel ikkje sette i gang aktivitetar som krev godkjenning før Mattilsynet har kontrollert at verksemda oppfyller krava.
På visse vilkår kan Mattilsynet gi vilkårsbunden godkjenning (artikkel 13). Innan 3 månader skal Mattilsynet ha gått gjennom dokumentasjonen som grunnlag for ei eventuell permanent godkjenning. Denne tidsfristen kan forlengast til maks 6 månader,
Registrering av primærprodusentar
Alle primærprodusentar som produserer fôr til eller fôrar dyr bestemte til næringsmiddelproduksjon, skal vere registrert.
Primærprodusentar som får produksjonstilskot vil automatisk bli registrerte via data frå Landbruksdirektoratet. Fiskeoppdrettarar (brukarar av fôr til fisk) vil automatisk bli registrerte via Fiskeridirektoratets register over akvakulturløyve.
Registrerte primærprodusentar skal tilfredsstille vedlegg I om krav til primærproduksjon av fôrvarer og retningslinjer for god produksjonspraksis, og/eller vedlegg III om god fôringspraksis. Dei skal også tilfredsstille anna relevant regelverk knytte til fôrvarer.
Halde unna registreringsplikta er
- fôrproduksjon til og fôring av dyr bestemt til næringsmiddelproduksjon som blir konsumert i eige privat hushald
- primærprodusentar som årleg sel eller omset inntil 15 tonn landbruksfôr (korn eller grovfôr) innanfor ein avstand av 30 km (forskrift om fôrhygiene § 3)
Særskilde krav til visse primærprodusentar
Produsentar som blandar sitt eige fôr og bruker (reine) tilsetningsstoff eller premiks, skal registrere seg via skjemaet "Registrering og/eller godkjenning av fôrverksemd" i Altinns skjemaløysing under aktiviteten "produksjon" og produksjonsforma "produksjon av blandingar til eiga besetning og som inneber *registering".
I tillegg til krava i vedlegg I og III skal primærprodusentar oppfylle krava i vedlegg II. De må også gjennomføre ein fareanalyse basert på HACCP-analyse og styre og kontrollere i tråd med denne. Det inneber å kartlegge forhold som kan utgjere ein fare for fôrtryggleiken og sette i gang risikoreduserande tiltak og rutinar.
Registrering av hestehald med produksjonsdyr som inngår i matkjeda
Viss ein eller fleire hestar i hestehaldet blir rekna som produksjonsdyr som inngår i matkjeda, må du registrere hestehaldet.
Den ansvarlege for hestehaldet har ansvar for registreringa og for at krava til god fôringspraksis og eventuelt fôrproduksjonspraksis blir følgde.
Registreringsordningar
Hestehald som får produksjonstilskot, blir registrert hos Mattilsynet via data frå Landbruksdirektoratet. Desse hestehalda treng derfor ikkje å gjere noko aktivt for å registrere seg.
Viss hestehaldet ikkje har rett til produksjonstilskot, må du registrere hestehaldet i Mattilsynets skjemateneste. Bruk skjemaet "Nytt dyrehald".
Krav til hestehaldet
Når det gjeld fôring av hest, gjeld vedlegg III om "god fôringspraksis".
Viss de i tillegg produserer fôr, skal de tilfredsstille vedlegg I om krav til primærproduksjon av fôrvarer og retningslinjer for god produksjonspraksis i tillegg til anna relevant regelverk knytte til fôrvarer.
Registrering av transportørar
Transportørar av fôrvarer må registrere seg hos Mattilsynet.
Fôrvarer i denne samanhengen er tilsetningsstoff, premikser (blanding av tilsetningsstoff), tilskotsfôr, fôrmidlar/råvarer og bruksferdige fôrblandingar.
Transportørar må registrere seg via skjemaet "Registrering og/eller godkjenning av fôrverksemd" i Altinns skjemaløysing med aktiviteten transport, og tilfredsstille relevante krav i vedlegget til forordninga 2, blant anna om reinhald, forveksling, kryssforureining og journalføring/sporbarheit.
De skal også gjennomføre ein fareanalyse basert på internasjonal standard (HACCP-prinsippa). Det inneber å kartlegge forhold som kan utgjere ein fare for fôrtryggleiken og sette i verk risikoreduserande tiltak og rutinar. For å bli registrert må transportverksemda erklære at krava er oppfylte.
Registreringskrav for *forsøksfôrinstitusjonar
Forsøksfôrinstitusjonar som ønsker å produsere fôr til dyr som skal inngå i fôr- og matkjeda, skal vera registrert etter forskrift om fôrhygiene.
Dersom fôret inneheld animalske råvarer, skal verksemda også vera godkjent etter TSE-forskrifta.
Det er av ulike omsyn behov for å utføre forsking på bruk av råstoff i fôr som ikkje samsvarar med fôrregelverkskrav. Forsøksfôrinstitusjonar som produserer slikt fôr, skal ikkje vera registrert etter forskrift om fôrhygiene. Dersom de bruker råstoff av animalsk opphav ved slike institusjonar, skal de vera registrerte som spesielle brukarar etter animaliebiproduktforskrifta.
Forsøksfôrinstitusjonar som er registrert etter forskrift om fôrhygiene
Registreringskravet vil gjelde så sant fisk og andre dyr frå enkelte forsøk går til konsum.
Institusjonen skal også vere godkjent etter TSE-forskrifta dersom de bruker fôrmiddel av animalsk opphav.
Institusjonen må følgje fôrregelverket på alle punkt. Regelverket har likevel ein del fleksibilitet som kan utnyttast.
Dersom de skal bruke animalsk materiale, må de sikre at animalsk protein er bearbeida ved eit bearbeidingsanlegg som er godkjent etter animaliebiproduktforskrifta.
Importerte råvarer skal ha gjennomgått ordinær importkontroll, inkludert eventuell veterinær grensekontroll.
Fisk og andre dyr frå fôringsforsøk kan gå til konsum.
Det kan vera mogleg å få utstedt eksportsertifikat for fôrvarer.
Forsøksfôrinstitusjonar som ikkje er registrert etter forskrift om fôrhygiene
Verksemda skal vere registrert som spesiell brukar etter animaliebiproduktforskrifta dersom de bruker råstoff av animalsk opphav.
Det vil vere tillatt å produsera forsøksfôr med råvarer som ikkje er tillatt i fôrvarer. Dette vil mellom anna vere råvarer som ikkje samsvarar med reglar i animaliebiproduktforskrifta og fôrmerkeforskrifta.
Det er ikkje krav om å følgje reglane i forskrift om fôrhygiene og TSE-forskrifta.
Det vil ikkje vere tillatt å produsere forsøksfôr til fisk og andre dyr som inngår i matkjeda.
Det vil ikkje vere mogleg å få utstedt eksportsertifikat for fôrvarer.
For både forsøksfôrinstitusjonar som er og ikkje er registrert etter forskrift om fôrhygiene, vil det vere mogleg å søke om løyve til å bruke ikkje-godkjente tilsetningsstoff i forsøksfôr, og det vil vere mogleg å søke om dispensasjon for bruk av GM-fôrvarer.