Mattilsynets hovudprioriteringar innan drikkevassforsyning i 2026

Dette er hovudmåla for det risikobaserte tilsynet med drikkevassforsyning. I tillegg til desse vil Mattilsynet, som vanleg, vareta løpande oppgåver, blant anna hendingar, prøvetaking, søknadsbehandling og oppfølging av bekymringsmeldingar.

Innhald på denne sida

Krav til rutinar: Farekartlegging, beredskapsplanar og øvingar for vassverkseigar
Råvasskvalitet og vassbehandling
Leveringssikkerheit og alternativ drikkevassforsyning
Vern av drikkevasskjelder i regulerings- og arealplanar

Krav til rutinar: Farekartlegging, beredskapsplanar og øvingar for vassverkseigar

Vassverkseigar skal ha rutinar som sikrar at farekartleggingar og beredskapsplanar er oppdaterte, og at det blir gjennomført øvingar.

Kvifor vel Mattilsynet å prioritere dette i 2026?

Vi tilpassar fokuset vårt på grunn av den endra sikkerheitssituasjonen i Europa og Norden.

Mattilsynet jobbar med å styrke beredskapen innan mattryggleik, drikkevatn, dyre- og plantehelse og dessutan atomberedskap. Vassforsyningssystem er ein av dei mest kritiske samfunnsfunksjonane, og vern og vedlikehald av desse systema er avgjerande for å sikre tilgang til trygt drikkevatn og støtte andre viktige samfunnsfunksjonar. Det er derfor viktig at Mattilsynet fører tilsyn med drikkevassforsyningane i 2026. Vi vil kontrollere om vassverkseigarar har etablert rutinar som sikrar at vassforsyninga oppfyller krava til helse, sikkerheit og leveringssikkerheit, og at rutinane er baserte på ei farekartlegging.

Korleis planlegg Mattilsynet å jobbe med dette?

Vi vil bruke vassverksdata frå dei årlege innrapporteringane og andre risikobaserte kriterium for å velje ut vassverk vi ønsker å føre tilsyn med i 2026. Gjennom tilsyn vil vi også rettleie vassverkseigarar om kor viktig regelmessige farekartleggingar er, at resultata etter kartlegginga blir vidareførte inn i revisjon av beredskapsplanen, og at vassverkseigarar gjennomfører øvingar baserte på oppdaterte planar.

Kva betyr det for deg?

De skal gjennom den årlege innrapporteringa svare på spørsmål under temaet "Sikkerheit/Beredskap/Internkontroll". Svara skal vere oppdaterte i forhold til aktiviteten i 2025.

Vi vil i løpet av 2026 utføre tilsyn med eit utval vassverk. Gjennomføringa av tilsynet vil bli varsla, og vi vil avtale tidspunktet for gjennomføringa med dykk.

Forskrifta om digital tryggleik tredde i kraft 1. oktober 2025, og ho gjeld for alle vassforsyningssystem som handterer minst 2000 m³ vatn per døgn. Mattilsynet vil i løpet av 2026 begynne å føre tilsyn etter denne forskrifta.

Relevante lenker

§ 6 Farekartlegging og farehandtering - Rettleier til drikkevassforskrifta

§ 9 Leveringssikkerhet - Rettleier til drikkevassforskrifta

§ 10 Dere skal sikre vassbehandlingsanlegget og distribusjonssystemet - Rettleier til drikkevassforskrifta

§ 11 Beredskap - Rettleier til drikkevassforskrifta

§ 12 Beskyttelsestiltak - Rettleier til drikkevassforskrifta

Leveringssikkerheit for drikkevatn

§ 1.23 Tilbydere av samfunnsviktige tjenester (lovdata.no)

Råvasskvalitet og vassbehandling

Vassbehandlinga ute i vassverka skal vere tilpassa råvasskvaliteten og farekartlegginga.

Kvifor vel Mattilsynet å prioritere dette i 2026?

Innbyggarane skal ha tilgang til tilstrekkelege mengder helsemessig trygt drikkevatn som er klart og utan framståande lukt, smak og farge. Vatnet som det blir produsert drikkevatn av, blir henta frå kjelder i grunnen eller overflatekjelder i eit vassdrag. Vasskvaliteten blir påverka av aktivitetar i og rundt kjeldene, og vi ser i tillegg at klimaendringane fører til endringar av vasskvaliteten.

Det er viktig at vassverkseigarane følger med på dei endringane som skjer, og regelmessig vurdere behovet for å endre/utvide vassbehandlinga (vassreinsinga) for å kunne halde fram med å produsere trygt drikkevatn. Vi ønsker å bidra til at vassverkseigarane har merksemd på desse endringane, og at dei arbeider systematisk med å kartlegge og overvake vasskvaliteten, slik at det er etablert vassbehandlingstrinn som handterer endringane/variasjonane i vasskvaliteten.

Korleis planlegg Mattilsynet å jobbe med dette?

Vi vil gjennomføre tilsyn med vassbehandlingstrinna hos vassverkseigerane. For å kunne etablere ei effektiv vassbehandling må ein ha kjennskap om vasskvaliteten i kjelda. Vi ønsker å sjå om vassverkseigarar gjennomfører regelmessige analysar av vatnet frå kjelda det skal produserast drikkevatn av, og om vasskvaliteten blir overvakt gjennom heile året slik at årstidsvariasjonane blir kartlagde.

Vidare vil vi sjå om det er etablert tilstrekkelege hygieniske barrierar i vassbehandlinga, i lys av analyseresultat, trendar og utvikling i vasskvaliteten i kjelda og nedslagsfeltet for kjelda.

Vi ønsker å sjå på om vassverksseigar i farekartlegginga si har vurdert påverkinga frå klimaendringane på råvasskvaliteten og den etablerte vassbehandlinga.

Kva betyr det for deg? / Kva kan du / verksemda di forvente?

De skal ha etablert ein prøvetakingsplan som er basert på ei farekartlegging, og som viser utvikling av vasskvaliteten over tid. De skal også ha vurdert om det er forhold i nedslagsfelt eller i kjelda som påverkar eller kan påverke vasskvaliteten, og/eller om klimaendringane påverkar eller kan påverke vasskvaliteten.

Ut frå desse undersøkingane og den kjennskapen de har, skal de ha etablert tilstrekkelege hygieniske barrierar i vassbehandlinga, som også er robust nok å fungere tilfredsstillande sjølv om vasskvaliteten vil variere. Vi vil i løpet av 2026 utføre tilsyn med eit utval vassverk. Gjennomføringa av tilsynet vil bli varsla, og tidspunkt for gjennomføring blir avtalt med dykk.

Relevante lenker

§ 13 Vannbehandling | Veileder til drikkevannsforskriften

§ 6 Farekartlegging og farehåndtering | Veileder til drikkevannsforskriften

Leveringssikkerheit og alternativ drikkevassforsyning

Mattilsynet følger opp leveringssikkerheita til vassverka og den alternative drikkevassforsyninga.

Kvifor vel Mattilsynet å prioritere dette i 2026?

Alle vassforsyningane skal levere trygt drikkevatn til kvar tid, og samfunnet har eit behov for å kjenne status og utfordringar om leveringssikkerheit ved vassforsyningsanlegg. Vi ønsker å bidra til at vassverka etablerer robuste reserveløysingar som sikrar leveringssikkerheita når den ordinære vassforsyninga sviktar, og vi vil derfor prioritere dette arbeidet i 2026.

Korleis planlegg Mattilsynet å jobbe med dette?

Vi skal gjennom rettleiing og forvalting av regelverket bidra til at vassverkseigarar etablerer tilfredsstillande leveringssikkerheit, held distribusjonssystem ved like og aukar utskiftingsgrada på leidningsnettet. Regelverket stiller tydelege krav til leveringssikkerheit, og vi skal i møte med vassverkseigarane rettleie rundt krava og forventingar til alternativ drikkevassforsyning.

Vidare vil vi i gjennomgangen og oppfølginga vår av den årlege innrapporteringa til vassforsyningane av vassverksdata ha ekstra merksemd på data som er knytte til leveringssikkerheit. Inspektørane vil utføre tilsyn hos vassverka og delta i felles møtepunkt med bransjen.

Kva betyr det for deg?

Du skal igjennom den årlege innrapporteringa svare på tre spørsmål under temaet "Alternativ drikkevassforsyning" som ein del av innrapporteringa på leveringssikkerheit.
Spørsmåla er:

Kor mange prosent av abonnentane kan den alternative drikkevassforsyninga levere drikkevatn til?
Kor mange døgn kan den alternative drikkevassforsyninga forsyne abonnentane?
Er den alternative drikkevassforsyninga avhengig av at det blir levert nødvatn?

Vi vil i løpet av 2026 utføre tilsyn med eit utval vassverk. Gjennomføringa av tilsynet vil bli varsla, og tidspunkt for gjennomføring blir avtalt med dykk.

Relevante lenker

§ 9 Leveringssikkerhet - Rettleier til drikkevassforskrifta

Leveringssikkerheit for drikkevatn

Vern av drikkevasskjelder i regulerings- og arealplanar

Kommunane er kjente med relevante krav til vern av drikkevasskjelder, og dei tar omsyn til drikkevasskjelder i arbeidet sitt med kommunale planar (regulerings- og arealplanar og dispensasjonar).

Kvifor vel Mattilsynet å prioritere dette i 2026?

Det er viktig at drikkevasskjelder og nedslagsfelta og tilsigsområda til kjeldene blir gitt vern gjennom dei kommunale planane. Dette er viktig for å unngå forureining av vatnet som skal bli til drikkevatn. Det er også samfunnsøkonomisk smart å verne og ta vare på drikkevasskjeldene våre.

Vi har registrerer at fleire drikkevasskjelder framleis ikkje har fastsett omsynssoner med føresegner i dei kommunale planane. For at vi skal kunne ta vare på produksjonen av trygt drikkevatn i både kort og lang tidsperspektiv, må vi verne kjeldene våre mot aktivitetar og tiltak som kan gi auka fare for forureining av vatnet.

Korleis planlegg Mattilsynet å jobbe med dette?

Kommunane skal sende nye og endra planar på høyring til oss som sektormyndigheit på fagområdet, og vi skal svare på alle saker som berører drikkevatn i planane, direkte eller indirekte.

Vi ønsker å bli involverte så tidleg som mogleg, og helst ved oppstart av planarbeidet. Vi vil delta i dei regionale planforummøta i regi av fylkeskommunane, vi ønsker å delta i felles møtepunkt med kommunar og planleggarar, og vi vil sjølve også kunne invitere til nettmøte med eigne tema. Vi vil føre vidare tilsynet med kjeldevern hos vassverkssigrane.

Kva betyr det for deg?

Vi ønsker at de skal sende alle planane på høyring til oss, så tidleg som mogleg i planprosessen og helst gjennom eitt oppstartsvarsel. Har de behov for rettleiing frå oss, ta kontakt – også viss det er behov før planprosessen startar. Inviter oss gjerne til felles kommunale eller regionale møteplassar, for rettleiing og erfaringsutveksling. Rettleiingstekstar finn de på nettsidene våre. Vi vil i løpet av 2026 utføre tilsyn med eit utval vassverk. Gjennomføringa av tilsynet vil bli varsla, og vi vil avtale tidspunktet for gjennomføringa med dykk.