Fievrredat go don bohccuid biillain dahje biilajorriin? De soaittát dárbbašit gelbbolašvuođaduođaštusa

Publisert 13.12.2018     Sist endret 04.01.2019

Elliide sáhttá fievrredeapmi garrasit čuohcat, ja leat máŋga beali maid galggat fuolahit vai sihkkarasttát ahte elliin lea buorre dilli fievrredeami oktavuođas. Muhtin oktavuođain gáibiduvvo danne sierra kursa ovdal go dus lea lohpi fievrredit elliid eallinaga.

Gii dárbbaša gelbbolašvuođaduođaštusa elliid fievrredeapmái?

Jus áiggut fievrredit elliid ealáhusdoaimma oktavuođas, de fertet leat čađahan kurssa ja ožžon gelbbolašvuođaduođaštusa. Ealáhusdoaimmalaš elliidfievrredeapmi lea ovdamearkka dihte fievrredeapmi njuovahahkii, earáid elliid fievrredeapmi ovtta guohtuneatnamis nubbái ja fievrredeapmi turistaealáhusa oktavuođas.

Leat muhtin oktavuođat goas duođaštus ii leat dárbbalaš. Don it dárbbaš gelbbolašvuođaduođaštusa jus fievrredat elliid astoáiggedoaimmaid oktavuođas. Ovdamearkan dasa lea herggiid fievrredeapmi gilvovuodjimiid oktavuođas. It ge dárbbaš gelbbolašvuođaduođaštusa jus fievrredat iežat bohccuid ovtta guohtunguovllus nubbái. ‘Iežat boazun’ rehkenastojuvvojit maiddái earáid bohccot seamma siiddas, mat fievrreduvvojit siidadoalu namas.

Buohkain geat fievrredit elliid, lea ovddasvástádus das ahte elliin lea buorre dilli mátkkis ja maŋŋel mátkki

Eallit streassaluvvet fievrredeami geažil, ja erenoamážit giđđat ii leat diehttelas ahte buot eallit cevzet maŋŋel go leat fievrreduvvon. Maŋŋel fievrredeami lea deaŧalaš ahte bearráigehččojuvvo ahte buot eallit leat dearvan. Lea elliid eaiggáda ovddasvástádus dárkkistit ahte ii oktage ealli leat lápmahuvvan dahje eará ládje gillán nu ahte leat sihkar ahte dat bures cevzet maŋŋel fievrredeami.

Jus it dieđe dárbbašat go don gelbbolašvuođaduođaštusa, de sáhtát jearrat iežat báikkálaš Biebmobearráigeahčus, tlf. 22 40 00 00

Fant du det du lette etter?